Джанлы Озен

Э-эй, коюмизнинъ башына нелер кельмеди?! Буларны тильнен айтып, къалемнен язып битиралмазсынъ…

Мында душманлар олгъан вакъытта, бизим топрагъымыз аякъкъа котерильгенде, биз къартлар ве къартанайлар, эвлятларымызгъа:

– Кетинъиз, айды кетинъиз, бизим еримизнинъ юзюни денъиштиреджек адамларгъа барынъыз, оларгъа къошулынъыз ярдым этинъиз. Биз сизлерге ярдым этермиз, – дедик. Бизим огъланларымыз дагъларгъа, орманларгъа чыкъып кеттилер. Орманлар шувулдай, дерсинъ агълай эдилер. Коюнъизде душман тура эди. Куньлер агъыр эди…

Ябанджыларнынъ силя ве ашайтлары бар эди. Дагъларда гизленген бизим огъланларымызнынъ исе, не силясы, не де ашайтлары бар эди. Биз къартлар, элимизден кельгени къадар огъулларымызгъа ярдым эте эдик. Олар орманларда бош отурмай чалыша, куреше эдилер. Ашайттан пек замет чеккенде озенчикке бакъа да:

– Сен, озенчик, пек шенсинъ, коюмизнинъ янындан кечип кетесинъ. Сен бизимкилерге айт, бизде отьмек битти, – дейлер.

Озенчик оларгъа:

– Яхшы, айтырым, – деп, ашагъы догъру акъып кете эди. О кой ичинден яваш-яваш акъып кеткенде:

– Къартлар, огъланларынъызнынъ отьмеги биткен, замет чекелер, – дей эди.

– Я биз оларгъа отьмекни насыл алып кетермиз, ёлларны душман къапатты да? – деп сорай эдик.

Озенчик:

– Сиз къартлар, къапыста япракъларыны алынъыз, оларнынъ устюне отьмек салынъыз, о якъыны мен озюм беджеририм, – дей. Биз де шай япамыз. Озенчик, устьлерине отьмек

олгъан къапыста япракъларыны къыргъа къаршы алып кете. Мен буны озь козюмнен корьдим, сен кульме, озенчик бизим огъланларымызгъа ялынъыз отьмек дегиль, керек олгъан эр шейни ташыды. Куньлерден бир кунь озенчик бизге:

– Сиз къартлар, не бакъып турасынъыз, огъулларынъызгъа силя керек, – деди. Бизлер мадамки бизим огъулларымызгъа силя керек, бу силяны тапайыкъ да, огъулларымызгъа йиберейик, дедик. Дедик де, силяны озенчикке теслим эттик. Озенчик яваштан силяларны юкъары догъру акъызып алып кетти. Анда ялыгъа ташлады. Огъулларымыз силяланып,

еримизнинъ юзюни денъиштиреджек адамларгъа къошулдылар. Къошулдылар да, бирликте душманны айдап енъдилер. Иште, бойле этип огъулларымыз топрагъымызнынъ озюни бир тамам темизледилер ве койге къайтып кельдилер. Бутюн къартларнынъ огъуллары къайтып кельди.

Возможно вам понравится...

Добавить комментарий

Ваш e-mail не будет опубликован. Обязательные поля помечены *